ടൊറൻ്റോയിലെ സബർബൻ മേഖലകളിൽ വാഹന ഇൻഷുറൻസ് പ്രീമിയം തുക വർദ്ധിക്കാൻ സാധ്യതയെന്ന് റിപ്പോർട്ട്

ടൊറൻ്റോ നഗരത്തിൻ്റെ സബർബൻ മേഖലകളിൽ താമസിക്കുന്ന വാഹന ഉടമകൾക്ക് വരും ദിവസങ്ങളിൽ ഉയർന്ന വാഹന ഇൻഷുറൻസ് പ്രീമിയം തുക നൽകേണ്ടി വന്നേക്കുമെന്ന് റിപ്പോർട്ട്. ഈ മേഖലകളിൽ വർദ്ധിച്ചുവരുന്ന വാഹനാപകട നിരക്കുകളും ക്ലെയിമുകളുടെ എണ്ണവുമാണ് നിരക്കുകൾ ഉയരാൻ പ്രധാന കാരണമായി പറയുന്നത്.

നഗര കേന്ദ്രങ്ങളെ അപേക്ഷിച്ച് സബർബൻ മേഖലകളിൽ ദീർഘദൂര യാത്രകൾ ചെയ്യുന്നവരുടെ എണ്ണം കൂടുതലായതിനാലും, കനത്ത ട്രാഫിക് ബ്ലോക്കുകൾ മൂലം അപകട സാധ്യത വർദ്ധിക്കുന്നതിനാലും ഇൻഷുറൻസ് കമ്പനികൾ ഈ പ്രദേശങ്ങളെ ഉയർന്ന റിസ്ക് വിഭാഗത്തിലാണ് ഉൾപ്പെടുത്തിയിരിക്കുന്നത്. കൂടാതെ നവീന സാങ്കേതികവിദ്യകളോടെ പുറത്തിറങ്ങുന്ന ആധുനിക വാഹനങ്ങളുടെയും ഇലക്ട്രിക് വണ്ടികളുടെയും റിപ്പയറിംഗ് ചെലവുകളിൽ ഉണ്ടായ വൻ വർദ്ധനവും പ്രീമിയം തുക കൂട്ടാൻ കമ്പനികളെ പ്രേരിപ്പിക്കുന്നുണ്ട്. 

ഗ്രേറ്റർ ടൊറൻ്റോ ഏരിയയിലെ വോഗൻ , ബ്രാംപ്ടൺ , മിസിസാഗ തുടങ്ങിയ സബർബൻ നഗരങ്ങളിലെ താമസക്കാരാണ് ഈ വില വർദ്ധനവിൻ്റെ ആഘാതം പ്രധാനമായും നേരിടേണ്ടി വരിക. നിലവിൽ ഒൻ്റാരിയോയിലെ തന്നെ ഏറ്റവും ഉയർന്ന ഇൻഷുറൻസ് നിരക്കുകൾ രേഖപ്പെടുത്തുന്ന പ്രദേശങ്ങളാണിവ. വിപണിയിലെ വർദ്ധിച്ചുവരുന്ന ജീവിതച്ചെലവും ഇൻഷുറൻസ് തട്ടിപ്പുകളും പ്രീമിയം നിരക്കുകൾ കുത്തനെ ഉയരുന്നതിന് കാരണമാകുന്നുണ്ടെന്ന് സാമ്പത്തിക വിദഗ്ദ്ധർ വിലയിരുത്തുന്നു.

ഈ സാഹചര്യത്തിൽ വാഹന ഉടമകൾ വിവിധ ഇൻഷുറൻസ് കമ്പനികളുടെ നിരക്കുകൾ താരതമ്യം ചെയ്ത് കൃത്യമായ പോളിസികൾ തിരഞ്ഞെടുക്കണമെന്നും, മികച്ച ഡ്രൈവിംഗ് റെക്കോർഡ് സൂക്ഷിക്കുന്നത് വഴി ഒരു പരിധി വരെ തുക കുറയ്ക്കാൻ സാധിക്കുമെന്നും അധികൃതർ നിർദ്ദേശിക്കുന്നു.